Kalman

Ik doe et disse weke kalman. Vandaege hadden Jan en Diana uut Aalten kommen zuld. Ik gao bi’j de meitied altied een dag naor heur en dan kommen ze in de naozoemer een dag naor mi’j toe. Mar dat gaot now even over. Ik gao zaoterdag ok niet naor een verjaordag toe. De boel moet van binnen even weer op ‘e regel kommen. D’r kwammen vandaege ok weer aorige kaorten over de post mit de beste weensken. Dat is hiel aorig. D’r bin de laeste weke trouwens ok vekaansiekaorten van alderhaande meensken kommen. Van Henk en Philo kwam d’r een kaorte uut et Beierse Woold en van Saakje iene uut de Efteling. Vandaege kwam d’r een kaorte van Jelle en Gerda mit de groeten uut Winterswiek. Op ‘e kaorte staot Berenschotwaetermeule. Daor bin ik ok al es mit Jelle west. Doe zatten we daor in een zoemerhusien en hewwe daor mooie fietstochten maekt. De buurtschoppen om Winterswiek henne bin wondermooi. Jan, Diana en Roelien hebben doe nog een aovend bi’j oons op vesite west. Mar dat is al een jaormennig leden.