Kaktussen

Ik wodde de laeste weke veur van alles en nog wat vraogd en ik hebbe overal nee op zegd. Ik kan gewoon niet alles anhaelen. As ik een verhael schrieven wol veur meensken die zoveul jaor trouwd weren, as ik argens een kastverhael veurlezen wol, as ik wat zeggen wol bi’j een bi’jienkomst van alderhaande lekaole omroepen. Dat laeste kon niet omda’k dan al wat aanders hebbe. En kastverhaelen schrief ik nooit, dan kan ‘k ze ok niet veurlezen. Et is gewoon te vule, dit soort dingen. Ik hebbe in dit geval deurverwezen naor de Schrieversronte. Daor kennen ze grif schrievers die dat wel doen en ze ok wel argens veurlezen willen..
Vandemiddag het Jarina hier weer west. Naodat Peleis Et Loo toestemming geven het veur et bruken van een petret van een jonge Wilhelmina veur vellegies postzegels, het PostNL now ok toestemming geven. Dat we hebben vandemiddag een hiele mooie postzegel ontwurpen en daor hewwe votdaolik een fluttien vellegies van besteld.
Ik hebbe op et ogenblik vuuf kaktussen in de bluui. Et is een wonder! Ik hebbe d’r vandaege iene van op petret zet en die staot hieronder.