Kabberet

Anke het de boel vandaege schonemaekt, zodat de gaasten zodaolik in een net en superschoon huus kommen. Ik hebbe vandemiddag nog even op ‘e fiets naor Berkoop west om een peer bosschoppies. Et is lieke lekker fietsweer as dat et gister was. Wat mi’j anbelangt mag et wel zo blieven tot de kastdaegen an toe en dan naachs zo now en dan es een lekker fris bujgien. Mar a’k et goed begrepen hebbe, gaon de tempereturen naor beneden… Ik kriege aanst drie gaasten: Fettje, Gerda en Jelle kommen hier over de heerd en ze blieven te eten. Ze kriegen huspot mit een tippe gelderse wost en spekkies. Butendat he’k een schaole appelsmotse klaorstaon. Die he’k vleden jaor van Hendrik en Beitske kregen doe die hier een naacht uutvanhuusden in heur camper op ‘e oprit. Et is dus appelsmotse uut Jorwerd. En dan nog wat naospieze en daor zullen ze et mit doen moeten. Nao et eten gaon we hier naor oons mfc De Ni’je Stienze. Daor geven de vrouwluden van de beroemde kabberetgroep Twie recht twie averecht uut Willemsoord en omstreken een ongetwiefeld spetterende veurstelling.