JVS

De ni’je website van de Johan Veenstra Stichting is now ok klaor. Aj’ op disse website op JVS klikken, komt hi’j te veurschien. Van daor kuj’ ok weeromme naor disse website. Et bestuur van de JVS is oonze webmaster Pieter de Vries slimme erkentelik veur zien professionele wark. We stikken him een hiele toefte veren op zien daenkbeeldige hoed! Omdat de JVS de ANBI-staotus het is wat d’r op ‘e website staot veurschreven deur de belastingdienst. We moe’n zien laoten wawwe doen willen, wawwe daon hebben en de financiële verantwoording en zo. Et zal dudelik wezen dat et bestuur ok een protte hinder ondervunnen het van de coronapandemie. Et was altied de gewoonte en vergeerder bi’j mi’j thuus in Ni’jhooltpae, mar daor konnen we mit vuuf man niet genoeg ofstaand holen. We vergeerderden de laeste peer jaor zodoende in et Centrum veur Prentkeunst van de Stichting Nobilis op ‘e Fochtel. Soms is een vergeerdering niet deurgaon. Een protte wark is via de mail en tillefonisch ofdaon.
Et is vandaege een pikzwatte dag in Europa. Ruslaand is een oorlog begonnen tegen Oekraïne. Dat laand is gien lid van de NAVO. De drie Baltische lanen, Estlaand, Letlaand en Litouwen, bin dat wel. As Poetin die lanen ok inpikken wil en daor etzelde doen gaot, is een Dadde Wereldoorlog een voldongen feit. Zo griezelig leit de wereld d’r op dit mement henne.