JVS-vergeerdering

Vandemorgen om acht ure ha’k al warkvolk om de deure. Johan en Jan hebben zorgd veur de ni’je zunnewering butendeure. Dat kwam meraokelse goed van passe mit een temperetuur van 31 graoden. Et staot trouwens hiel arg mooi. En doe kwam Anke ok nog om de boel schone te maeken. Ik was intied op ‘e fiets naor Wolvege veur fysiosport. In de loop van de middag kwammen de bestuursleden van de Johan Veenstra Stichting hier veur de zoemervergeerdering van de JVS. Fleurig en allat hewwe alle punten van de agenda bi’jlanges west. Nao et vergeerderen hewwe hier mit mekeer waarm eten: romige tomatesoep, eerpels en zoerkool uut de ovend, gelderse wost, spekkies en kezeschnitzel. En dan nog fruityoghurt as naospieze.

Hieronder dan nog twie foto’s van de boottocht van gister. Boven: disse mooie meule staot tussen Menaldum en Berlikum. Onder: hier veerden we bi’j et dörp Ried langes. Hier he’k jaorenlaank in juni verteld op et midzoemer verteldersfestival.