JVS

Gistermorgen vleugen d’r een peer verwi’jde koppelties gaanzen over mien huus henne en in een zwink miende ik dat ien van de gaanzen een blauwe baand om de hals hadde. Zol et Gustaaf west hebben? Meesken die hier niks van snappen, moe’n mien verhael Gustaaf uut de bundel Wonder boven wonder mar es lezen. Dat wodt jim alles dudelik!

Vandemorgen hewwe hier de wintervergeerdering van de Johan Veenstra Stichting had. We hebben uutgebreid praot over de goeie doelen daor we de kommende peer jaor geld an geven zullen. Meensken kun gien subsidie anvraogen bi’j de stichting. Et bestuur zocht zels goeie doelen uut. Geld anvraogen kan eerst as de naemgever van de stichting uut de tied raekt is. Ik hope dat zoks nog even duurt, mar in wezen is een meens gien dag zeker van himzels. Ik hadde gister een ronde kruudkoeke bakt daor we vandemorgen op te zette gaon binnen en nao de vergeerdering hewwe hier mit mekaander eten. Ik hadde een panne vega-romige tomatesoep en een flut belegde broties klaorstaon. Ik mag hopen dat gieniene d’r miskommen van kregen het. An et aende van de middag he’k nog een bakkien drinken had bi’j Jarmo van Computerservice Hofma in Wolvege.