JVS

Ik hebbe vandemorgen weer naor de dokter west veur een behaandeling mit stikstof en doe ‘k weer thuus was, he’k een appeltaart bakt. We hebben hier vanof half vufe de uutstelde eerste halfjaorlikse vergeerdering van de Johan Veenstra Stichting en daor heurt vanzels appeltaart bi’j die deur ien van de bestuursleden vakkundig ansneden wodden zal. Nao de vergeerdering blieven de bestuursleden hier eten. We kriegen eerst gruuntesop mit ballegies en dan he’k een ovendschottel mit twie laogies eerpelpuree mit daor tussen kookte witlof en d’r wat saus en raspte keze overhenne. En daorbi’j dan nog een hamburger van de slaachter van Berkoop. As toetien kan d’r keuzen wodden uut roomyoghurt mit Spaanse sinesappel of roomyoghurt mit perzik en maracuja. As ze hier niet zat van wodden kunnen, wee’k et ok niet meer.
Ik kreeg vandaege een kaorte toestuurd van vier vrouwluden: Vera, Merel, Anne en Marjan. Die zitten in et Portugeze Canhestros in een huus van vrunden en passen daor op honnen van die meensken en zwemmen in heur zwembad bi’j 35 graoden! Dat was mi’j toch een tikkeltien te waarm.