Jouster Merke

Vandemorgen he’k in De Rank in Wolvege mien jaorlikse coronaprikkien kregen en doe biwwe d’r even op uut west naor De Jouwer. Et was Jouster Merke. Daor wa’k nog nooit west. Dat is vanzels een gemis. Et was d’r smoordrok. Ik wodde meerdere keren anspreuken deur meensken die mi’j wel kenden mar ikke heur niet. Mar wie ik wel kende… Ik zag Hennie van de Schrieversronte daor ok mit anhang. Die is ok overal. Vleden weke zag ik heur op et terras bi’j de Driewegsluus. Doe weren ze onderweg naor Edam en now al weer op ‘e Jouwer! We hebben vandaege een smak centen uutgeven. Now ja, ik kreeg gister van Drees. We hebben kleren bi’j Terra kocht en ik hebbe laeter in Wolvege nog Floris van Bommel-schoenen kocht. Niet et goedkoopste mark. Bi’j Terra kregen we een bakkien drinken en een klein gebakkien. En bi’j de schoenen kreeg ik een sukerbolle van bakker Kruiper. We hebben vanaovend zalm had in et resteraant bi’j de Koepelbos in Berkoop. Doe we thuuskwammen zat d’r een mooie kaorte in de busse van en vermoedelik ok uut Harlingen. Een kaorte van Ankie en die schrift: Elke dag begin ik met jouw internetdagboek! Dan denk ik: ‘Hier ist die Welt in Ordnung.’ Now, dat is toch slimme aorig! De Jouster Merke, ni’je schoenen en een kaorte uut Harlingen, wat wil een Stellingwarver schriever nog meer!