Jong wegraekte dichter

Dagboeklezer en Stellingwarver in de vremde Henk Bijl uut Leverkusen stuurde me een oold gedicht in et Stellingwarfs van een zekere Tj. U. de Haan. Et is een gedicht over Sliekenborg en et wodde eertieds publiseerd in et Nieuwsblad van Friesland, een bi’jblad van Hepkema’s Courant.  De dichter was indertied schoelemeester in Oosterzee en is jong wegraekt. Hi’j is mar 25 jaor wodden. Op 24 november is et 120 jaor leden dat hi’j uut de tied raekte. Ik hadde nog nooit van him heurd en hebbe Henk Bloemhoff d’r over maild. Die hadde d’r ok nooit van heurd. We kun d’r wel van uutgaon dat dit een tot now an toe onbekende dichter was. Zoe’n ontdekking is toch wel hiel arg mooi. We hebben ofpraot dat ik d’r een artikel over schrieven zal veur et Stellingwarver tiedschrift De Ovend.

Daegenlaank het hier een pimpelmesien veur een raem van mien warkkaemer ommeflodderd. Van boven naor beneden en zo mar deur. Wat wol dat besien toch? In huus? Misschien zag hi’j himzels wel weerspiegelen in et glas. Zol dat et west hebben? Dan was et een soort Narcissus die zien eigen spiegelbeeld in et waeter zag en verliefd op himzels wodde. Zol dat mit et pimpelmesien ok zo west hebben? We zullen et nooit weten. Vandaege was hi’j d’r niet meer.