Joe Speedboot

Vandemiddag he’k in Wolvege een peer Floris van Bommel-sneakers kocht, dat betekent dat et een peperdure dag is. Ik kon in Wolvege haost gien plakkien veur de auto vienen. In verbaand mit et opkallefateren van et dörp liggen d’r straoten eupen en de paoskermis slokt ok een protte parkeerplakken op.

Ik hadde nog nooit een boek van Tommy Wieringa lezen en dat is toch een hiele bekende schriever. Zoks kan vanzels niet, dat ik hebbe now zien bekende roman Joe Speedboot lezen. De leden van de biebeltheek kregen dat boek vleden jaor gratis. Ikke dus ok. De eerste drok van et boek verscheen in 2005. Et boek dat ik now hebbe is de 61ste drok. Dat is niet gek! Dit jaor komt de verfilming van et boek uut. Ik hebbe de roman mit genoegen lezen. Et is et verhael van Fransje Hermans die nao een slim ongelok in een rolstoel zit en niet meer praoten kan. Mar dan komt hi’j in de kunde mit een jonge die in et dörp komt te wonen en al op jonge leeftied een vliegtuug bouwt. Een jonge die zien eigen naeme verzunnen het: Joe Speedboot. Et is een roman over kammeraodschop, rivaliteit, liefde en verraod. Een mooi boek! Et is ok mooi dat de schriever soms een streektaelzinnegien bruukt.