Jeu de boules

Vandaege het tuunman Jaap hier west om de tuun te doen. Mit et ontuugmesienegien is hi’j over de stienen van oprit en patties gaon. Wat is et daor van opknapt! Hi’j het hier vandemorgen koffie en tussen de middag champignonssoep had. Hi’j mos doe naor een aandere klus. Omdat et hier nog niet klaor is, komt hi’j morgenvroeg mit Andrea, mar dan moet ik naor fysiosport en kan ‘k niet veur koffie zorgen. Dat is spietig, mar ik kan mar op ien plak toegelieke wezen.

Onderstaonde foto kreeg ik toemaild van buurman Anton, die ok veurzitter van plaetselik belang is. D’r wodt op et ogenblik warkt an et anleggen van een ni’je jeu de boules-baene bi’j oons mfc De Ni’je Stienze. Die baene wodt eupend op deensdagmiddag 23 juni om 2 ure. Daornao begint et jeu de bouleskampioenschop van Ni’jhooltpae. Ik zal bi’j de eupening wezen. Anton hadde me een schoffien leden vraogd en schrief wat in et Stellingwarfs. Ik hebbe een gedicht maekt mit de slim verrassende titel Jeu de boules. Dat komt op een bod bi’j de baene te staon en dat lees ik daor die middag ok veur. De eupening van de baene vaalt in de Bluuiweke van Ni’jhooltpae. Die duurt van 21 t/m 28 juni. Elke dag bin d’r dan meerdere aktiviteiten in et dörp.