Jeu de boules

Vandemorgen he’k even op ‘e fiets naor Wolvege west om wat bosschoppen, naor de biebeltheek om een boek op te haelen en iene te bestellen en ik hebbe een bakkien drinken had bi’j Jarmo en zien moeder. Thuus he’k de slaopkaemer beneden in odder maekt. Vanwege de hitte slaop ik vanof vannaacht beneden. Dat schilt nogal wat graoden!

Waarm of niet waarm, hiete of niet hiete: et is feest in Ni’jhooltpae. Vandemiddag is de ni’je jeu de boulesbaene eupend. Die is vlakbi’j oons mfc De Ni’je Stienze. Daor mos vanzels een protte subsidie veur op et klied kommen en die centen bin d’r kommen! Jaorige buurman Anton Hoekstra, de veurzitter van plaetselik belang, eupende de middag mit een toespraoke in et Stellingwarfs. Zoks vien ik mooi! Daornao moch ik et bod mit mien gedicht onthullen en ik hebbe et gedicht veurlezen. Op et bod staot ok een foto van mi’j en een QR-kode. Aj’ daor op klikken koj’ van alles over mi’j te weten. Dat vien ik ok mooi! Vervolgens hul wethoolder Heidi den Hartigh van West-Stellingwarf een praotien en zi’j eupende de baene. En doe wodde d’r speuld om et kampioenschop van Ni’jhooltpae. Iederkeer wodde d’r trakteerd op draankies en lekkere happies. In et schaad en mit een betien wiend was et daor wel uut te holen. Een gezellige middag! Hieronder twie foto’s die ‘k maekt hebbe. Boven: et bod mit mien gedicht d’r op. Onder: Wethoolder Heidi den Hartigh (rechts) eupent de baene.