Jerre

Vandemorgen he’k naor Jerre Hoorzorg in Et Vene west. Dat is schieve tegenover et ziekenhuus. Ik moet een ni’j heurapperaot hebben. Krap zeuven jaor leden kreeg ik mien eerste, et is now neudig an een ni’jen iene toe. Mar et het hiel wat haelen om de klinke had veurdat ik daor vandemorgen terechte kon. Ik zol op 15 september al henne. Mar krek op die dag en die tied mos ik naor een begraffenis in Sloten. Doe moch ik kommen op 13 oktober. Mar krek op die dag en die tied mos ik naor een begraffenis in Ielst. Hoe wil et toch zo toevallig. Vervolgens moch ik op 10 november kommen. Mar ja, doe was ik slimme verkolen en snotterig en wollen ze me daor liever niet hebben. En doe moch ik op 11 december langeskommen. Aovens teveuren wodde ‘k ofbeld, de vrouw bi’j wie ik wezen mos was ziek wodden. En doe kon ik daor dan eindelik vandemorgen op 8 jannewaori terechte. Mit vier maonden vertraoging! Ik moet over twie weken weer henne.