Jenevers en likeuren

Zaoterdagmiddag (eregister) he’k Jan en Riny uut De Jouwer op vesite had. Ik hadde Riny heur boek besteld en dat brochten ze, onderweg naor Willemsoord, even an. Et boek hiet: Verhalen van een barvrouw uit hartje Mokum. Riny is van Drentse ofkomst en hadde tot 2019 in Amsterdam et pruuflekaol In de Olofspoort veur jenevers en likeuren. Ze zat daor in een vierhonderd jaor oold gebouw tegenover de Warmoesstraote. Midden in de rosse buurt. En dan maek ie hiel wat mit. Daor kuj’ wel een boek vol verhaelen over schrieven en dat het ze dus daon. Wie d’r wel niet bi’j heur over de vloer kwammen! De vaaste klaanten, toeristen uut de hiele wereld, prostituees, de beroemde zangeresse Aafje Heynis daor Riny les van hadde, Majoor Bosshardt van et Leger des Heils, muzikaanten en zangers en preenzen van Oranje. Ik zal et boek vermoedelik in iene goeze uutlezen. Riny woont now dus op ‘e Jouwer en heur partner is Jan Peereboom. De zeune van de melkboer van De Blesse. Zien moeder was Margje Eits, de zuster van Trien. En Trien en Knelis woonden vroeger vlakbi’j mien oolde huus. Jan mos dus omke en tante tegen heur zeggen. Hi’j praot dan ok Stellingwarfs!

Zowel gister- as vandemiddag he’k even op ‘e fiets naor Wolvege west. Wat is et nog prachtig weer! Vandemiddag naor fysiosport omda’k vleden vri’jdag niet kon omda’k mit Jan Berend naor Breda was. Gistermiddag he’k bosschoppen daon en ik zag Ronald lopen. Hi’j stopte as liesttrekker van zien perti’j overal foolders in de brievebussen. We hebben genoeglik even praot. Mit twie fietstassen vol en een tasse an et stuur bin ‘k doe weer op huus an gaon.