Jeanne Bieruma Oosting

Ik hebbe et mooie boek Jeanne Bieruma Oosting en de prentkunst van Peter Kooij en Pieter Jonker now hielemaole lezen en veural ok bekeken. Een prachtig uutgeven boek van de Stichting Nobilis mit tal van ofbeeldings. Et is hiel biezunder om et verhael over heur leven te lezen en ok hiel biezunder om al dat mooie wark bekieken te kunnen in dit boek. Et was dit jaor De Zoemer van Jeanne en wel een stok of zeuven museums bestededen andacht an heur en heur wark. Meensken uut et hiele laand reisden al die tentoonstellings bi’jlanges. Zo kwam d’r een bratse volk naor et Centrum veur Prentkeunst op ‘e Fochtel. Daor hadden ze et nog nooit zo drok had. En aj’ dochten dat et nao Jeanne weer rustig wodden zol, haj’ et mis. De meensken hadden et pad naor De Fochtel veurgoed ontdekt. Op ‘e tentoonstelling mit wark van Antje Veldstra kwam ok een protte volk of en now is d’r een tentoonstelling mit wark van Herman Gordijn. Ik wil d’r ien disser daegen graeg even henne om disse tentoonstelling te bekieken. Herman Gordijn is vanzels bekend wodden deur zien mooie petret dat hi’j van Beatrix maekt het. Ik wil binnenkot graeg zien wat d’r van him op ‘e Fochtel hangt.

Ik stappe in de loop van de middag in de auto en dan rie ik via Berkoop naor Vrouweperochie op Et Bildt. Daor he’k in resteraant De Molen een ofspraokien mit vier biezunder aorige meensken. We bin trouwens wel es in de boot bi’j die meule langesveerd. Een prachtig plakkien!