Jarmo

Vandemorgen he’k op ‘e fiets naor Jarmo in Wolvege west. Ik hebbe him fielseteerd mit et vermeerderen van jaoren. Hi’j is vandaege 25 jaor wodden. Wat hej’ dan nog een leven veur je… Ik hebbe zegd da’k wel mit him ruilen wol, mar hi’j wol dat niet. We hebben genoeglik even praot en ik hebbe heerlik oranjegebak had. Vervolgens he’k nog even naor de supermark west en ik wodde anklaampt deur verschillende meensken die me kenden en me vertelden over ziekten, ongemakken en krupsies. Ik raekte ok an de praot mit een vrouw die et zo vreselik vun dat boekhaandel Zwikstra d’r niet meer is. Ze wol mien laeste beide boeken nog zo graeg hebben, dat die zal ik heur ien disser daegen brengen. Vandemiddag he’k nog een lekkere kruudkoeke bakt.

Vleden zaoterdag kreeg ik et eerste exemplaor van et boek Noordwolde (on)herkenbaar veranderd van DAN-veurzitter Harry Komduur. Ik hebbe et boek vanzels drekt lezen en veural bekeken. Hiel mooi! Een protte foto’s van hoe Noordwoolde d’r eertieds hennelag en op etzelde plak bin foto’s maekt van hoe as et d’r now uutzicht. Soms is d’r vreselik vule veraanderd en soms ok niet iens zovule. Veur meensken die in Noordwoolde wonen of d’r ooit woond hebben, liekt me dit een prachtig boek toe.