Johan Veenstra
Stellingwarver schriever en verteller

Jaorvergeerdering

Plaetst op 29 oktober 2022.

Sunny Jansen hul gisteraovend in Museum Heerenveen een mooie lezing over et leven van Albertine Agnes. De zael van et museum zat hatstikke vol. D’r weren ok meensken uut de Stellingwarven op ofkommen. Ik hebbe naost mien oold-kollega Lykele Buwalda zeten. Albertine Agnes hul heur prima staonde in een mannewereld. Ze was schraander en duste wel wat an. Ze leut heur de keze niet van et brood eten. Zi’j gaf et bevel om de Friese Waeterlinie in warking te zetten doe we hier bedreigd wodden deur de soldaoten van Bommen Berend. Ze hadde gelokkig ok hiele goeie adviseurs. Op militair gebied vanzels heur femilielid Johan Maurits van Nassau-Siegen die de troepen hier anvoerde. Johan Maurits leut et Mauritshuus in Den Haag bouwen. Ik hebbe et boek van Sunny Jansen gisteraovend vanzels ok kocht: De vrouw die Friesland redde. Een deur heur signeerd exemplaor. Ik hebbe d’r al wat in lezen. Mooi!

Vandemiddag wa’k in MFA MeJander in Berkoop bi’j de jaorvergeerdering van de Stellingwarver Schrieversronte. D’r was meer volk as in veurige jaoren en d’r hong een fleurige en optimistische sfeer. We gaon en kun d’r weer tegenan! De saemenwarking mit de subsidiegevers is nao slim muuizeme jaoren now weer hiel goed. Dat is hiel belangriek! Alle verschillende websites van de SSR wo’n opheven en d’r komt ien ni’j webstee veur in de plak. Op ‘e hennereize bin ‘k bi’j de Kuunder langes naor Berkoop fietst. An de Meulereed he’k disse foto maekt. De koenen genieten ok van et ooldewievezoemertien wawwe op et heden beleven. Ik bin mit Annie Dedden weerommefietst naor huus. Zi’j is vervolgens deurfietst naor Wolvege.