Jaorvergeerdering SSR

In de Schatkaemer van Beeld en Geluud in Hilversum is een protte moois te vienen. Ik zitte daor ok in. Now ja, mien stemme zit d’r in. Henk uut Leverkusen, een Stellingwarver in de vremde, stuurde me gister een opnaeme van et radiopergramme Kunstwacht dat uutzunnen wodde op 1 november 1994. Hi’j hadde dat opsnord in de Schatkaemer van Beeld en Geluud. In dat radiopergramme van de VPRO las ik twie gedichten veur en ik vertelde d’r wat over: Mien oolde huus en Sletel parredies. Beide gedichten staon in de bundel Sletel parredies en die bundel wodde op zaoterdag 1 oktober 1994 prissenteerd tiedens et Stellingwarver Boekebal bi’j Daans Domein Drenth in Wolvege. Dat weet ik nog wel, mar ik wete niet meer da’k in dat bewuste radiopergramme twie gedichten veurlezen hebbe. Ik hebbe aanders best wel een goed onthoold, mar d’r staot me niks meer van bi’j. Ik hebbe mien agenda van 1994 d’r es op naokeken, mar daor staot d’r niks over vermeld. En toch is et waor. Ik hebbe et now zels heurd. Mien stemme klonk doe dudelik ietsien jonger, vien ik zels. Mar ik bin et wel. Et is echt gebeurd en et bewies zit in de Schatkaemer in Hilversum!

Vandemiddag he’k in Berkoop naor de jaorvergeerdering van de Stellingwarver Schrieversronte west. Ze hebben et daor niet echt makkelik de laeste tied. D’r bin te min vri’jwilligers en te weinig bestuursleden. Butendat is nao nog mar vier maonden de ni’je direkteur al weer opstapt. D’r moet dus ok een ni’je direkteur kommen. Ik geve et je te doen. Hopelik komt et allemaole weer goed. Arjan Sterken, de laeste direkteur, gaf nao et schoft een overzicht van hoe et d’r mit et Nedersaksisch veurstaot. D’r bin neffens him nog zat kaansen om jongeren d’r veur te interesseren. Mar dan moe’n we inspeulen op wat die jongeren zels willen en aorig vienen.