Jacobskruuskruud

Donderdagsaovens is oonze dorpsmark weer bi’j et mfc. Ik hebbe d’r gisteraovend even henne west en hebbe een bossien bloemen van Trijntje kocht en twie stokkies gebak van Anna. Laeter he’k de prachtige film Cast away mit Tom Hanks nog es weer bekeken. Een geweldige akteur! Hi’j overleeft een vliegtuugongelok en komt op een onbewoond eilaand terechte. Wat een prachtig spel as hi’j tegen een balle praot die hi’j Wilson nuumd het. Nao vier jaor wodt hi’j redded as de bemanning van een vrachtschip him dobberen zicht op een vlot. En dan is zien geliefde trouwd mit iene aanders… Vanaovend za’k Forrest Gump nog es weer bekieken.

Ik hebbe vandemiddag een fietstochien van 33 kilemeter maekt. Et was 22 graoden en lekker weer. Bi’j de Kuunder langes bin ‘k naor de sluus onder Ni’jberkoop gaon en doe naor Bekhofschaans. Wat reuk et pas mi’jde grus daor heerlik! Mar ja, de beien van de sepiepen bin al weer oranje. De tied hoolt ok dit jaor gien tel schoft. Over De Hoeve bin ‘k weer naor huus gaon.

Hieronder een foto van een polle Jacobskruuskruud die ‘k vandemiddag maekt hebbe in de Kuundervallei. Die plaanten ziej’ zo staorigan overal in overvloed. Ze bin nuumd naor de heilige Jacobus de Meerdere, die zien feestdag op 25 juli was. Morgen dus. De boeren moe’n d’r niks van hebben omdat de plaante vergiftig is, mar koenen en peerden vreten echt wel om de pollen henne. Et wodt aanders as ze in kuil en huj terechtekommen. Ze bin aanders prachtig om te zien en bin slim nuttig omdat d’r een protte vlinders/insekten op ofkommen. Dat he’k vandemiddag zels konsteteren kund.