Jacoba, Dochter van Holland

Ik hebbe de historische roman Jacoba, Dochter van Holland van Simone van der Vlugt lezen. Wat een mooi boek! Et gaot over Jacoba van Beieren (1401-1436). Ze leefde in de tied van de Hoekse en Kabeljauwse Twisten. Aj’m vroeger op schoele goed oplet hebben, moet jim dit toch wel hiel bekend veurkommen. Jacoba was veur heur tied beheurlik feministisch. D’r wodde heur een protte onrecht andaon. Ze kreeg hiel wat te verduren in heur leven. Mar ze duste et wel op te nemen tegen alderhaande malle doerakken van kerels die heur gezag perbeerden te ondergreven. Op heur vuuftiende wodde ze al wedevrouw en al rap daornao raekte heur vader, graaf Willem VI, weg. Zo wodde ze gravinne van Hollaand, Zeelaand en Henegouwen. In de 35 jaor dat ze leefde het ze vier keer trouwd west. Mit de Fraanse kroonpreens Jean van Touraine, mit heur neve Jan VI van Braobaant, mit Humphrey van Gloucester, de breur van de Engelse keuning en mit Frank van Borssele. En die laeste ken ik nog wel van de geschiedenisverhaelen van meester Andringa op ‘e legere schoele. Jacoba van Beieren en Frank van Borssele heurden bi’j mekaander. Jacoba wodde begreuven in de Hofkapel op et Haagse Binnenhof. Ik hebbe et boek mit groot genoegen lezen. Et lest as een trein en et verveelt gien ogenblik!