It swetshok

Ik schrieve de laeste jaoren verhaelen veur et Stellingwarver tiedschrift De Ovend naor anleiding van foto’s uut mien archief. In et kommende juninommer doe ik dat niet, dan komt d’r een verhael over een oons onbekende Stellingwarver dichter. Daornao kommen d’r weer verhaelen naor anleiding van foto’s. Ik hebbe vandaege mit een verhael an de gang west, mar et is nog lange niet klaor. Ik hope et op zaoterdag of laeter of te maeken.

Ik hebbe vanzels De fjildferhalen van Rink van der Velde. Ik hebbe al zien boeken. Mar d’r bin meer Friese schrievers die mooie fjildferhalen schrieven kunnen. Ik hebbe et boek It swetshok van Gjalt de Groot lezen. De ondertitel is Ferhalen fan in fjildman. Dat zegt al genoeg. In et zwetshokke van Gjalt de Groot staot wat riet tegen de kaanten, d’r hangen aolefoeken en posters van skûtsjes. D’r liggen wat entekorven en d’r is een wekker die altied stillestaot omdat de tied hier van jezels is. Daor kommen zomar mooie verhaelen veur ’t locht. Ik hebbe et boek mit groot genoegen lezen. Verhaelen over jaegen, visken, aoleroken, eierzuken, in et veld ommebeinselen. Mooie verhaelen!