Iselin was bijna thuis

Vandemiddag hebben Jan en Durkje even bi’j me keken. We hebben genoeglik praot en bin eins van doel en gao een keer mit ’n drienend een fietstochien maeken. As de oolde huud mar wat mitwarkt… Vanaovend komt veur de vierde aachterienvolgende keer Tom Hanks bi’j me over de heerd. Vanaovend de film The Terminal. Die he’k ok wel es eerder zien, mar dat maekt niks uut.

Nao al die Zweedse thrillers bin ‘k now mit een Noorse serie uut aende zet. De Jacob Weber-reeks van Orjan Karlsson. Jacob Weber is pelisieinspekteur in Bodo, een Noorse stad boven de poolcirkel. In de winter kleurt et noorderlocht daor de naachten gruun en in de zoemer is de zunne d’r altied bi’j. Weber warkt tegere mit de jonge rechercheur Noora Yun Sande, die uut Oslo komt. De serie bestaot tot now an toe uut vier boeken en ik wil ze allemaole lezen, want et eerste boek, Iselin was bijna thuis, was hiel mooi. De 19-jaorige Iselin Hanssen komt nao et hadlopen niet thuus. Ze daenken eerst dat ze votgaon is, mar dan wodt heur t-shirt vunnen dat onder et bloed zit. We hebben dus te maeken mit een misdrief. Iselin heur vrund is de zeune van ien van de riekste mannen van Bodo. Iederiene daenkt dat hi’j d’r wat mit te maeken het. Mar dan raekt d’r nog een jonge vrouw te zuke…