Irnsum en Borkum

We bin vandaege van 10 ure vandemorgen tot half 6 in de naomiddag et waeter op west mit de boot. Ze hadden een waarme zoemerdag veurspeld, mar dat was et vandemorgen eerst nog niet. Doe koj’ wel een jassien an verdregen, mar vandemiddag was et een stok lekkerder. Doe was de zunne d’r iederkeer bi’j. We bin over Warga en Grouw naor Irnsum veerd. Daor gebeurde wat wonderliks. Ik docht gewoon toevallig even an mien verhael Elsschot in Naozoemerlaand. Dat gaot over een man die thuus een vervelende, mierkerige vrouw zitten het en een vrouw die thuus een lamzak van een kerel zitten het. Ze lao’n de mierkerd en de lamzak allienig thuus en gaon d’r tegere vandeur naor et Duutse eilaand Borkum. Ik docht daor an en keek naor rechts en… daor lag in Irnsum een boot uut Borkum. Dat is toch wel hiel wonderlik. Over Akkrum biwwe naor Grou veerd en doe naor resteraant Ie-Sicht. Daor hewwe vandemiddag eten op et terras. Doe we daor zatten zag ik een boot mit een vlagge van de Aachterhoek bi’j et terras langesveren. Ik hebbe nog keken as Jan en Diana lichtkaans in die boot zatten, mar dat was dus niet zo. Over Eernewoolde biwwe veerderveerd. Hieronder een foto van vandemorgen. D’r hongen doe zwatte wolkens boven Irnsum, mar d’r is gelokkig gien spat regen uut kommen.