Ireen

Gistermiddag he’k vesite had van Pieter en Peter. We hebben genoeglik bi’jpraot. Omdat et van ’t jaor zoe’n betien et Jeanne Bieruma Oosting-jaor is, hebben Fettje en ik oons alvast opgeven veur een mooie kulturele busreize van et Centrum veur Prentkeunst op ‘e Fochtel naor museums in Zutphen en Almen. In Zutphen komt Jolande Withuis in de bus. Zi’j is de biografe van Jeanne Bieruma Oosting en keuninginne Juliana. Deo en Corona Volente!
Vandemorgen zag ik ikonische en historische tillevisie. Ireen Wüst is 35 jaor en ze dot mar liefst veur de vuufde keer an de Olympische Speulen mit. Dat is op himzels al hiel biezunder, mar ze wun op een indrokwekkende meniere goold op et keuninginnenommer: de 1.500 meter. Wat een prestaosie! Et was schitterend om te zien! Ik leefde slim mit en wat he’k d’r van geneuten! Op al die vuuf Olympische Speulen het ze iedere keer een goolden medallie wunnen en nog een hiele flut zulveren en broonzen d’r bi’j. Ze is now echt de beste hadriedster van de hiele wereld en van alle tieden! Ik zat mit een flut spanning in de huud te kieken naor de vrouw die de vingernaegels opschilderd hadde in rood, wit, blauw en oranje. En doe et zeker was dat ze wunnen hadde, de Japanse niet an heur tied toekwam, gaf ik een hadde galp. Poes zat mi’j mit grote ogen an te kieken. Hi’j snapte d’r niks van. Wi’j holen slim van mekaander, mar d’r bin mementen in et leven dawwe mekaander now ienkeer niet begriepen.