Interview veur Landleven

Ik hebbe vannaacht min slaopen en doe wodde ik om kwat veur negen eerst wakker. Poes zat mauwende naost mien bedde. Dat ik mos anmaeken, want om tien ure belde Jolanda Hofland uut Lochem. Die het me drie kertier interviewd veur et glossy tiedschrift Landleven. Dat is een prachtig tiedschrift, ik hebbe verschillende nommers lezen en/of kocht doe ‘k de laeste keer in et ziekenhuus lag. D’r staot ok een streektaelrebriek in, Ai’j plat kunt praoten, daor meensken in interviewd wodden die heur mit streektael doende holen. D’r komt ok nog een fotograaf langes om me op petret te zetten.

Ik zol vandemiddag krek een aende fietsen doe Harry en Frans even langeskwammen. Ze brochten me een pot frambozesjem uut de Fraanse Pyrenenen. En dat as daank omda’k andacht an heur vekaansie gaf in dit dagboek. Ik geve altied andacht an meensken die me vanof heur vekaansieadres ansichtkaorten en appies sturen. Et zol niet verkeerd wezen as die as daank me in et vervolg ok een pot sjem gavven.

Ik hebbe gistermiddag 25 kilemeter fietst en vandemiddag 33 kilemeter. Ik bin gister bi’j de Kuunder langes naor Berkoop fietst en doe over Noordwoolde en De Hoeve weer naor huus toe. Vandemiddag bin ‘k over De Hoeve, Hooltpae, Der Izzerd, Mildam en Berkoop fietst. Et was beide keren heerlik fietsweer. Beide keren kwam ik Joost en Geertje tegen. Die kuierden en hadden twie zakken bi’j heur. Iene veur et ofval dat meensken overal hennesmieten en een poede om ofval in te doen wat geld weerd is. Blikkies en flessies daor staosiegeld op zit. Prima wark. Meer meensken zollen zoks doen moeten. We hebben vandemiddag gezellig even praot. Hieronder twie foto’s die ‘k vandaege maekt hebbe. Boven: et witte broggien over de Lende tussen de haastkleuren. Onder: poddestoelen an de Vinkegevaortweg. Et gebeurt mar hiel of en toe da’k d’r ok echt een podde op zitten zie.