Interview Frieslaand Post

Marije de Lange is ien van de zes schrievers die mitdot an et Kedoboek van de Friese Boekeweke. Ze schrift butendat ok veur de Frieslaand Post. Dat mooie tiedschrift gaot andacht besteden an de Stellingwarver film Sultan van Bercoop. Marije wol Steven de Jong (regisseur), Sybren Hofstra (akteur) en Johan Veenstra (schriever) graeg interviewen. As dat vandaege ok kon in de Filmkarke van Hooltwoolde. Mar krieg op kotte termien mar es drie meensken bi’j mekeer. Dat lokt je niet. Steven zit de hiele weke in Hilversum en de karke is dichte. Doe was et plan om oons mit mekeer tillefonisch te interviewen. Mar as alleman deur mekeer hennepraot en dan ok nog tillefonisch… Dat is veur mi’j niet te doen. Mien geheur is zo staorigan zo slecht dat ik dat niet naokommen kunnen zol. Zodoende het Marije vandemorgen wel tillefonisch praot mit Steven en Sybren. Ik kreeg heur vraogen an mi’j over de mail en daor heb ik vandaege votdaolik antwoord op geven. Mooi dat d’r andacht veur de film in de Frieslaand Post komt.

Van de tien veurstellings van de film bin d’r now al vufe hielemaole uutverkocht. D’r bin nog een peer kaorten veur de veurstelling van 20 november. Nog wat meer kaorten bin d’r veur de veurstellings van 14 november (middags), 18, 19 en 22 november. Griep jim kaans om een unieke film te zien! Zie de agenda van www.filmkerkwolvega.nl  Hieronder ien van de mooie filmposters.