Instituut

Poes kwam vandemorgen es weer in de kaemer mit een levendige moes. Hi’j was d’r zuver maltaepelig van. We mossen naor zien idee tegere lekker speulen mit de moes die gauw aachter een kaaste kreup. Ik hebbe de kaasten en kassies van de waand scheuven en uuteindelik he’k een dekentien over de moes gooid en die nog altied levendig en wel butendeure brocht. Wat altied een gedoe… Ik hebbe ok nog een kollum schreven, uutwarkt en in de komputer opsleugen. Op ‘e Eupen Stal doe ‘k ieder jaor wel idenen op. D’r kwam laestdaegs een man op me of en die zee dat ik een instituut bin. De titel van de kollum is dus Instituut. Ik kriege trouwens hiel geregeld van meensken te heuren dat ze mien kollums in de Liwwadder Kraante mit genoegen lezen. Dat is mooi!

Doe ‘k zokrek om zes ure in Berkoop de deure uutgong, begon et wat te spatteren. Dat ik bin naor huus toe mar niet bi’j de Kuunder langesfietst. Dat hadde trouwens wel kund, et spatteren zette niet deur. Hieronder een foto die ‘k an et begin van de middag maekt hebbe. De meensken die hier wonen bin middags op et ogenblik mien buren. Dit is de oolde pasteri’je en die staot naost et gebouw van de Stellingwarver Schrieversronte. Et huus en de tuun bin prachtig opknapt. Op et hekke staot: Huize De Pastorie. Anno 1838.