Instituut

We hadden vandaege mit de boot et waeter op zuld, mar de berichten weren niet al te best. D’r wodde regen veurspeld en die kwam ok. In Berkoop om half viere henne. Ik bin dus gewoon naor Berkoop west om boeken te verkopen. En ondaanks de regen was d’r een rekord verkoopbedrag. Dat is mooi. Vandaege ston mien kollum Instituut in de Liwwadder Kraante. En dat he’k weten. D’r kwam een mooie mail van een Friese schriever en verschillende meensken zeden vandemiddag Dag Instituut tegen me. D’r kwam zels een kollega-schriever en oold gemientepolitikus uut Berlikum speciaol naor anleiding van die kollum mit zien vrundinne uut Nijmegen naor Berkoop. Hi’j wol dat zien vrundinne mit mi’j in de kunde kommen zol en ze mos ok mit mi’j op petret. Dat is allemaole gebeurd en we hebben een hiel schoft genoeglik praot.

Ik hebbe een dag of wat leden wat vitemine- en energiedraankies kocht om me een oppepper te geven. Op die energiedraankies staon de vuuf Olympische ringen. Ik gao d’r vanuut dat a’k flink wat van dat spul drinke, da’k dan over vier jaor an de Olympische Speulen mitdoen kan. Da’k daor dan fit en stark genoeg veur bin. Waor za’k dan an mitdoen? Ik twiefele tussen de vierhonderd meter hodden en et hinkstapveerspringen…