In Zeelaand bi’j Karel en Annie

Nog een dagboekstokkien…Ik was vandemorgen om ongeveer elf ure in Zeelaand in et ni’je huus van Karel en Annie. Et was best wel even zuken om dat te vienen. We hebben hier tussen de middag brood eten en vandemiddag he’k mit Karel een mooie fietstocht van 35 kilemeter maekt. We bin deur een lappe bos fietst, over de diek naost de Oolde Maas, deur een prachtig gebied mit bluuiende botterbloemen en meidoorns. Deur de dorpen Reek en Keent. Daor hebben we op et terras van een museumboerderi’je wat drinken had mit appelkeek. We bin ok deur Grave fietst en Grave beneden de Sluus. Bekend van de waeterstanen van vroeger. In Velp reden we bi’j twie kloosters langes. Ik hebbe even goed luusterd a’k ok een inwendige stemme heurde die me opdreug om asnog in te treden. Et bleef doodstille, dat ik bin doe mar deurfietst. Ik hebbe ze de kaans geven! Stel je veur da’k wel een stemme heurd hadde. Dat was ok wat west… We hebben zokrek waarm eten had in resteraant De Pastorie. Hieronder twie foto’s. Boven: de meule van Reek. Onder: botterbloemen en meidoorns.