In fauna fan ingels

Ik beginne krakkemikkig te wodden en hebbe meer hinder van spieren en gewrichten. Veur de spieren gao ‘k weer naor Marian veur fysio. Ik bin d’r vandemiddag weer veur de eerste keer west. D’r zitten allemaole zere plakkies, daor zi’j hopelik wat an doen kan.

Ik kope altied alle romans van Durk van der Ploeg. Mar doe In fauna fan ingels in 2022 uutkwam he’k dat niet kocht. Et is et verhael van een chronisch psychiatrische pesjent en ik docht da’k daor mal van wodden zol. Doe ‘k een goeie weke leden op ‘e morgen mit Durk in de Afûk-boekwinkel in Liwwadden was, vertelde een vrouw me dat et toch wel een hiel mooi boek was en doe he’k et asnog kocht. En ik bin drekt begonnen te lezen. Ik wodde mit et leven inzeugen van die pesjent die vertelt over zien wanen, aangsten en de tieden dat hi’j opneumen wodde in klinieken en ggz-instellings. Hi’j vertelt zien levensverhael. Over zien vader, moeder en de jonges, zien breurs. Allienig zien moeder het aorig veur him west. Zi’j bleef van him holen en hi’j van heur. Et is een gruwelik boek, een aangstanjaegend boek en een fantastisch mooi boek. Ik bin hiel bliede da’k et kocht en lezen hebbe.