In de Filmkarke

Gisteraovend he’k drie uren laank nog es naor de film Into the wild keken. Een waor gebeurd verhael. Chris McCandless (Emile Hirsch) wil nao zien studie wat van de wereld zien. Hi’j geft niks om geld en macht zoas zien oolden. Al zien bezittings geft hi’j vot en gaot, zonder et zien femilie te zeggen, op stap. Zien grote droom is om te leven in de wildernis van Alaska. Ik wus vanzels dat et niet goed oflopen zol. De iene wilde eerpel liekt veur haost honderd percent op ‘e aandere wilde eerpel. Mar de iene is vergiftig en de aandere niet… Wat een mooie en ontroerende film!

De eerste Stellingwarver speulfilm zal niet een film van drie uren wodden. Vandemiddag hewwe op ‘e Europese Dag van de Taelen over de film Sultan praot in de Filmkarke in Hooltwoolde. Abel Darwinkel en ik zatten daor mit regisseur Steven de Jong an de podcasttaofel. D’r was ok pebliek bi’j. We hebben praot over et verhael en hoe de film tot staand kommen moet. Hoe meer geld as d’r veur beschikber komt des te langer as de film wodt. Zo simpel is et. In de kraanten en et Stellingwarver tiedschrift De Ovend komt een oproep dat meensken heur opgeven kunnen om auditie te doen veur ien van de rollen. De eerste meensken hebben heur trouwens al opgeven. Meensken kun heur ok wel bi’j mi’j opgeven, dan geef ik et wel deur an Steven de Jong. Nao de praoteri’je hewwe naor de Grunningstaelige kotte film Peerd van Ome Loeks keken. Et was een mooie middag in Hooltwoolde.