Ik wor in de gaten hullen

Vandaege he’k een mooie fietstocht van 40 kilemeter maekt. Et was vandaege wel zunnig, mar d’r ston meer wiend as gister. Heerlik weer! Ik bin over Steggerde en De Eese naor Frederiksoord fietst. Daor he’k in et resteraant van et museum wat eten. Ik zag een anbieding op een bod staon: een kop aspergesoep en een plakke bolle mit rookte zalm. Dat leek me lekker toe en dat was ok lekker! Van daor bin ‘k naor Noordwoolde gaon. Daor he’k een foto maekt van de oolde restereerde tramlokemetief die now tegenover et oolde tramstesjon staot. Hatstikke mooi! Doe ‘k daor wat an ’t ommeheisteren en foto’s maeken was, heurde ik iene mien naeme roepen. Een vrouw uut de biebeltheek. Ze hadden me zien en wollen graeg weten wa’k an ’t doen was en a’k wat over de lokemetief in de kraante schrieven zol. Ik wor werachtig wel in de gaten hullen in Noordwoolde! Die foto was dus bedoeld veur dit dagboekstokkien en staot hieronder. Ik bin doe ok nog bi’j Harry op vesite west. Bi’j him he’k een peer bakkies drinken had en we hebben wat zeten te wiespraoten. Over de poletiek en zo… Vervolgens bin ‘k over De Hoeve weer naor huus fietst.