Ik ha’t ris hân…

Ik hebbe et boek Ik ha’t ris hân… van Ype Poortinga lezen. Poortinga wodde in 1910 in Rinsumageest geboren en raekte in 1985 in Liwwadden uut de tied. Hi’j is veural bekend wodden deur zien volksverhaelen. Hi’j kende et negentiende ieuwse volksleven op zien doempien en kon ommeraek vertellen. De verhaelen in dit boek gaon over Jan Hepkes Wouda (1862-1939) van Surhuustervene. In dat dörp staot een staandbeeld van him. Hi’j was vellekoopman en kon biesterbaorlike verhaelen vertellen van wat hi’j allegeer wel niet mitmaekt hadde. Hi’j was altied zels de held in zien verhaelen. Et was de Friese Baron Von Münchhausen. Poortinga het een hiele protte verhaelen van Jan Hepkes in dit boek bi’j mekeer brocht. Prachtige verhaelen! Midden in de winter was op een keer de mosterd op doe ze eten zollen. Dat Jan Hepkes dee de redens onder, steuf in een zocht naor een mosterdfebriekien op ‘e Lieke, kocht daor een pot mosterd, en steuf doe weer op ‘e redens op huus an. Hi’j kon zo allemachtig hadde rieden dat doe hi’j weer thuus was, weren de eerpels nog waarm in et bod en kon hi’j zo veerdereten. En et was altied waor gebeurd!

Op zundagmiddag 15 meert wodt in Harbarg Het Rechthuis in Rinsumageest een ode brocht an Ype Poortinga mit verhaelen, veurdrachten en meziek. Et begint om 3 ure. De kosten bin 12,50 euro. Masterferteller Douwe Kootstra dot mit en de tegenwoordige vertellers Aggie Meijer en Thom Boonstra. Zanger Marcel Smit zorgt veur de lieties en de meziek.