Ik bin gien oplichter meer

Et was een vreselik roezige en drokke dag. Vleden weke kwam d’r een bericht op et scharmpien in de auto dat d’r wat mis was mit de banespanning of zok-zo-wat. D’r was drokverlös konsteteerd. Ik zol niet weten wat a’k dan doen moet, dat ik bin vandemorgen naor de gerage in Et Vene west. En d’r was hielemaole niks te redden. Waoromme dat bericht dan op et scharmpien kwam wussen ze niet. Of zol Poetin de boel ontregelen willen en mit mien auto begint? Nog een groot perbleem is vandaege oplost. A’k op mien website keek, kree’k et bericht dat mien  website niet te vertrouwen was en de eigener de boel vermoedelik oplichten wol. Pattie aandere meensken kregen dat bericht ok. Jarmo het d’r vleden weke al een mail over verstuurd, mar dat haelde niks uut. Dat doe he’k zels nog een bericht verstuurd. Ik hebbe veteld wie a’k bin en wat a’k doe. En as ze mien woorden niet veur waor annemen wollen, dat ze dan mar infermeren mossen bi’j Roelof Theun Hoen, de kultuurwethoolder van West-Stellingwarf of Maarten Pennewaard, de heufdredakteur van de Liwwadder Kraante. Veurda’k et bericht verstuurde mo’k nog bewiezen da’k gien robot bin. In wat veur idiote wereld bin ik zo staorigan toch terechtekommen? Mar… ze hebben de waorschouwing in de loop van de middag weghaeld. Ik bin now inienend gien oplichter meer.

Anke brocht me rooie beien en wottels en peulties. Heerlik en zonder vergif. Omda’k gien geleisuker meer in huus hadde, bin ‘k drekt op ‘e fiets stapt en naor de winkel gaon om dat spul. Doe ‘k weer thuus was, he’k drie heerlike potten rooie beiesjem maekt. Now ja en doe kwam d’r een verzuuk a’k tiedens de Eupen Stal een aovend verzorgen wil mit de Friese schriever/dichter Syds Wiersma en a’k mitdoen wil an Taol an Taofel in Norg. D’r kwam ok weer een verzuuk a’k wel een gedicht schrieven wil veur een bekend instituut. Ik hebbe overal ja op zegd. Ik wete da’k et te drok hebbe en meensken zeggen vaeke da’k ok nee zeggen kan. Dat doe ‘k ok wel es. Ik sutele niet meer. Mar tegen een hiel arg eervol verzuuk kuj’ gien nee zeggen. Morgen gaon we heerlik ontspannen mit de boot et waeter op. Daor bin ‘k nao vandaege wel hiel arg an toe.