IJzige val

Gister gaf de auto an dat d’r drokverlies konsteteerd was. Alhoewel de auto ankem weke veur een grote beurt naor de gerage moet, mos ik vandaege toch even langeskommen. Now is alles weer goed. Ik hebbe ok nog verhaelen rippeteerd veur morgenmiddag en… ik zag een mooi stiekelvarken deur de bojembedekkers in de tuun scharrelen. Ik bin butendeure gaon en hebbe him een hiel schoffien bekeken. Mooi is dat. Doe hi’j een meter van me of was, bleef hi’j stille zitten, hi’j reuk lichtkaans onraod, en doe bin ik weer in huus gaon. Ik hope mar dat him niks mals overkommen mag.

Ik hebbe de spannende thriller IJzige val van Ulf Kvensler lezen. Vlak veurdat de tillefoon gaot droomt Isak onrustig over zien jeugd in Smaland: over zwatte voegels, et meer en de ogen van zien zussien Klara. Zi’j is mit heur moeder ommekommen doe heur huus ofbraande. Sund de braand het Isak zien vader Fredrik, die intied een beroemd keunstener wodden is, niet meer zien. En dan belt Fredrik him inienend op. Hi’j vragt as Isak bi’j him kommen wil. Hi’j het niet lange meer te leven en hi’j wil him beheurlik wat geld geven. Isak wiefelt, mar gaot toch. Is dat wel zoe’n goed idee? Hi’j komt terechte in een spel op leven en dood…