Johan Veenstra
Stellingwarver schriever en verteller

Iisbaan yn ‘e maaitiid

Plaetst op 21 juli 2022.

Een peer jaor leden he’k mitdaon an et grote projekt Iisbaan yn ‘e maaitiid. Now ja, et zol een groot projekt wodden, mar doe kwam corona dat zovule overhoop haeld het. D’r zol een boek kommen, een tentoonstelling, aovens mit veurdrachten, bustochten deur de perveensie… Dat boek is d’r wel kommen. Een prachtig uutvoerd boek dat uutgeven wodde deur uutgeveri’je Louise in Grou. Een boek mit wark van elf dichters in et Fries, Snekers, Bildts en Stellingwarfs. Butendat staon d’r foto’s van iesbaenen in van Baukje Venema en schilderi’jen van Hendrik Elings. Mar… now komt d’r toch ok een mooie tentoonstelling en die wodt vanaovend eupend in Museum Opsterlaand op ‘e Gediek. Ik zal daor dus henne. Et pergramme begint om half achte. Eddy van der Noord van uutgeveri’je Louise vertelt over et projekt, ik leze mien gedicht Bekentenis veur en Gerard de Jong zien gedicht Timen. Gerard en ik wisselen mekeer as kollumnisten in et Stellingwarfs en Bildts of op ‘e deensdaegen in de Liwwadder Kraante. Piter Wilkens het een speciaol lied kompeneerd over de iisbaan yn ‘e maaitiid. Bert Looper van Tresoar komt mit een historisch/kultureel verhael. En daornao bin d’r happies en draankies!