Johan Veenstra
Stellingwarver schriever en verteller

Iesbeelden

Plaetst op 31 jannewaori 2023.

We bin vandaege naor et Iesbeelden Festival in de Iesselhallen in Zwolle west. We hebben daor eerst wat drinken had mit netuurlik wat lekkers d’r bi’j. Veur de coronapandemie bin we daor ok al es west en et was krek as doe fantastisch mooi om te zien. Wat een keunsteners om zoks maeken te kunnen. Beelden over de geschiedenis van Iegypte, een prachtige David van Michelangelo, Manneke Pies uut Brussel, een protte wilde dieren en nog een hieleboel meer. En dat allemaole hiel mooi belocht. Ie lopen as et waore deur een sprokieswereld van ies en sni’j. Gao henne te kieken, et is nog tot de eerste weke van meert. Ie kieken je echt de ogen uut. Mar ie moe’n je wel dikke inpakken! In de grote hal stonnen allemaole grote konteners, daor aj’ je winterjasse, sjale en haansken in doen konnen veur Oekra├»ne. Ie konnen de boel laeter vanzels ok nog wel brengen. D’r hongen en laggen al een hiele protte jassen. Ik hebbe mien haansken d’r bi’j daon. Ik hebbe thuus nog wel een peer haansken en dissend van mi’j kun ze daorginderd grif wel bruken. Ik vien dit een mooie aktie. Op ‘e weerommereize hewwe nog even winkeld in de stad Stienwiek en we hebben een lekker bod waarm eten had bi’j Van der Valk in Wolvege. Hieronder een foto mit alderhaande wilde dieren van ies die ‘k in Zwolle maekt hebbe.