I.M. Roel Oostra en René Karst

De dood hoolt nooit ok mar iene dag schoft… Vri’jdag kreeg ik de rouwkaorte van Roel Oostra. De grote man van schouwburg De Lawei in Drachten. Roel is 104 jaor wodden. Wat een leeftied! Zo now en dan kruusten oonze wegen mekeer en we stuurden mekeer altied ni’jjaorskaorten. Roel kwam uut een Friestaelige femilie, mar as schoelejonge woonde hi’j in Wolvege. De taelmacht van et Stellingwarfs was doe nog hiel arg groot. Zodoende praotte Roel ok Stellingwarfs. Dat dee hi’j altied tegen mi’j. In de negentiger jaoren was hi’j de regisseur en leider van et Stellingwarfs Kabberet dat een jaormennig mit sukses optreden het. De Stellingwarver Schrieversronte is him wat dat anbelangt een boel daank verschuldigd. Een jaormennig leden kreeg ik de Rink van der Veldepries veur mien boek Vroeger is veurgoed veurbi’j in et gemientehuus van Drachten. Et was in coronatied en we mossen aanderhalve meter ofstaand holen. Mar tot mien grote verbaozing kwam Roel daor om et mit te maeken. Hi’j woonde d’r vlakbi’j, mar toch… Hi’j zat doe al om de honderd henne. Ik hebbe dat doe slim op pries steld. Et ofscheid is in besleuten femiliekring. Mar op 16 jannewaori wodt hi’j in zien schouwburg De Lawei herdocht en wodt zien leven vierd mit anslutend de veurstelling Kalunka.

Op vri’jdag kwam ok et ni’js van et uut de tied raeken van René Karst. Hi’j is mar 59 jaor wodden. Et leven is nooit eerlik. Ik hebbe René veur de eerste keer zien in schouwburg De Tamboer in Hoogevene. Dat zal in et begin van de tachtiger jaoren west hebben. Ik bin d’r mit Haarm in de auto henne west en Haarm zien vader en moeder en mien moeder weren d’r ok bi’j. Een nog jonge Marga Kool mit donker haor en een paorse jurk an prissenteerde de aovend. De bekende Drentse dichter en verteller Roel Reijntjes trad daor op en… Duo Karst. Et was de begintied van et duo dat enorm populair wodden zol. Jannie Karst-Dubbelboer en heur nog jonge zeune René. Zo now en dan kruusten oonze wegen mekeer. Duo Karst zong in et Nederlaans en et Drents. D’r verschenen een protte albums van heur. Ok albums mit oolde schoelelieties. Vanof 2007 hadde René mit sukses een solokarrière mit Nederlaanstaelig rippertoire. Preenses Amalia was een fan van him! Jannie Karst raekte in 2018 weg. Zi’j is 76 jaor wodden. René overleefde zien moeder dus mar 7 jaor. Et volk kan ofscheid van him nemen in zien schouwburg De Tamboer. Hieronder de foto van Roel Oostra die op zien rouwkaorte staot en een foto van et eertieds zo beroemde Duo Karst.