I.M. Jan Veenstra

Eregister kreeg ik et vreselike bericht dat de bekende Drentse schriever Jan Veenstra uut de tied raekt was. Jan was ziek en kon niet meer beter wodden. Hi’j is 74 jaor wodden. Jan was trouwd mit Marga Kool, ze woonden tegere in Linde. In de jaoren 70 schreef Jan zien eerste verhaelen in et Drentse literaire tiedschrift Roet. Hi’j schreef ok boeken, liedteksten en theaterstokken. Tegere mit Marga schreef hi’j kollums in et Dagblad van et Noorden. Ze schreven beidend zowel in et Drents as in et Nederlaans. Ze hadden ok tegere een Theaterschure in Marga heur oolde huus, schieve tegenover heur, ok in Linde. In 1997 kreeg Jan de SNS-literetuurpries en in september van dit jaor kreeg hi’j veur zien hiele oeuvre de gemientelike erepenning van de gemiente De Wolden. Ik kenne Jan en Marga lichtkaans al wel veertig jaor en geregeld kruusten oonze wegen mekeer. Alle boeken van Jan heb ik in de kaaste staon. In zien eerste boek, Zangeres van zulver, schreef hi’j op 8 november 1989: Veur Johan, een literaire kammeraod. En in zien laeste boek, De vaalrode vlieger, schreef hi’j op 12 meert 2023: Voor Johan. Al die meensken die wegraeken… Et geft me een leeg gevuul.