I.M. Frits van der Vinne

Tot mien grote schrik las ik vandaege in de Stellingwarf dat Frits van der Vinne op 1 november rempend uut de tied raekt is. Hi’j is 73 jaor wodden. Frits was de man van Boekhaandel Zwikstra in Wolvege die tot mien grote spiet twie jaor leden ophul te bestaon. D’r is gien ni’je boekewinkel veur in de plak kommen en dat is een groot gemis. Frits het van grote betekenis west veur de Stellingwarver Schrieversronte en et Stellingwarfs. Wat het hi’j een protte Stellingwarver boeken verkocht! Wat weet ik nog goed dat ik in 2006 bi’j him in de winkel signeren moch doe mien autobiografische roman Een brogge van glas uutkwam. D’r kwammen die middag zoe’n 80 meensken in de winkel om een boek te kopen en d’r hadden al 160 meensken een boek besteld. D’r stonnen staepels boeken veur me klaor en ik signeerde die middag een kleine 250 boeken. Onveurstelber! Ik sutelde dat jaor mit Fettje in Langedieke en een vrouw die Een brogge van glas al lezen hadde, vul me emotioneel om de hals. Fettje en ik verkochten in oktober 2006 op ‘e Boekemark in Drachten veur meer as duzend euro an Stellingwarver boeken. Dat was nooit eerder vertoond en dat is ok nooit weer vertoond. Et weren gloriejaoren veur de verkope van Stellingwarver boeken en Frits het dat mit oons mitmaekt. Et was ok zo mooi dat hi’j ieder ni’j boek van me zels ok las en me vertelde wat as hi’j d’r van vun. Om him te bedaanken veur zien grote inzet heb ik him op vri’jdag 14 juli 2023 in mfc De Ni’je Stienze in Ni’jhooltpae et eerste exemplaor anbeuden van mien laeste boek Naozoemerlaand. Zie de foto hieronder. Et was die dag een snikhiete dag en de maone ston aovens rood an de locht. Een peer maonden laeter gong Zwikstra dichte. Boven de rouwadverteensie in de Stellingwarf van vandaege staot Boeken waren zijn lust en zijn leven. Dit was zijn laatste hoofdstuk. Dat laeste heufdstok komt ok veur mi’j vusen te vlogge dichterbi’j. Ik zal altied hiele goeie herinnerings an Frits beweren en goeie herinnerings bin een protte weerd.