Huus Verwolde

Et was hier vandaege weer snik- en snikhiete. Krek as gister was et weer 36 graoden. Gien fietsweer. Alhoewel we gister en vandaege wel oolde knarren fietsen zaggen, mar die kun nog wel es van een koolde kermis thuuskommen en d’r malle krupsies en ongemakken an overholen. We bin in de loop van de morgen naor Laren reden, ongeveer tien kilemeter vanof Lochem. Ik hebbe daor in et verleden een stokmennig keren west om te vertellen veur de meensken van de streektaelverieninge Lochem en omgeving. Dinie Hiddink belde me dan altied. Mar die aorige Dinie is d’r niet meer en nao heur wegraeken bin ik d’r nooit weer west. We hebben daor in Laren et prachtige Huus Verwolde bekeken. Mit twintig man en een rondleider biwwe in een ure deur et Huus kuierd. Prachtig! Et Huus stamt uut 1776 en is 200 jaor bewoond west deur de baronnen Van der Borch van Verwolde. Laeter wodde et de femilie te kostber om alles onderholen te kunnen. Et is now ien van de zeuven kestelen van Geldersch Landschap & Kasteelen. Twie dochters van de laeste baron bin vanuut et westen disse kaant weer opkommen en wonen weer in verschillende huzen op et laandgoed. Ongeveer dattig jaor leden hebben Jelle en ik Huus Verwolde ok bekeken. Doe hewwe nao ofloop op een baankien veur et Huus zeten en nogal intensief over et leven praot. Dat hewwe now, nao al die lange jaoren, weer daon. Op percies etzelde plak. Over dattig jaor kan zoks nog wel es weer. In et centrum van Laren hewwe heerlik luncht op et terras van resteraant Witkamp. We hebben een koppien gruuntesop mit ballegies had en een gehakballe mit bolle. En doe biwwe weer naor Albert Heijn in Lochem gaon. Om half vufe begon et hadde te wi’jen en zokrek het et ommeraek regend. D’r kwam allemachtig stip! Ik hope dat d’r gien onweer komt. Morgen zal et 23 graoden wodden, dat is mar liefst 13 graoden minder as vandaege. Wat een verschil! Hieronder een foto die ‘k maekt hebbe van et prachtige Huus Verwolde.