Hunning

Vandemorgen het Anke hier de boel schonemaekt en ik hebbe intied verhaelen en gedichten rippeteerd veur morgen en overmorgen in Berkoop en Noord-Slien. En netuurlik he’k docht an kammeraod Haarm die vandaege veur de twiede keer in kotte tied oppereerd wodde in Liwwadden. Dat is een grote tegenvaler, want des te langer duurt et om weer op te knappen. Et is mar goed dawwe alles van teveuren niet weten.

Et was vandaege weer et mooiste weer van de wereld. Et was hier mar liefst 21 graoden. Ik bin lekker op ‘e fiets naor Wolvege west. Daor he’k bi’j iemker en aachterneve Piet weer acht potten hunning haeld. We hebben genoeglik even bi’jpraot. Hi’j vertelde dat et een goed hunningjaor is.

Van Douwe en Romkje kwam d’r via de app een foto. Ze bin op et ogenblik een dag of wat in de Fraanse Ardennen. Et huus op ‘e foto is heur vekaansiehuus. Pal an de revier de Maas. Kiek es even hoe hoge as et waeter staot. Nog een peer bujjen en ze moe’n maeken dat ze votkommen!