Hunning en kossen

An et begin van de middag he’k op ‘e fiets naor aachterneve en iemker Piet in Wolvege west om weer acht potten hunning op te haelen. Ik neme altied verschillende soorten mit: koolzaod, bloemen, liendeblossem… Ik bruke een protte hunning, ok deur de thee. Piet hadde nog een mooie en lekkere tip. Zien moeder dee eertieds een dun laogien hunning op een beschuut, leut dat d’r vervolgens even intrekken, dan kwammen d’r plakkies erebeie op en daor  weer een peer druppen hunning over. Ik hebbe et vandemiddag drekt uutperbeerd. Heerlik! Ik kocht laestdaegs een stok of vuuf erebeieplaanten bi’j de Welkoop en die he’k in een hoge rieten körf plaant en now krie’k dus iederkeer een beschuut mit erebeien. We hebben even bi’jpraot, mar niet zo lange as aanders, want Piet mos naor zien bi’jen die in Ooldetriene staon. Et is een best hunningjaor en et spul wodt him omtrent onder de hanen weghaeld. Op 29 juni staot hi’j mit zien heerlike hunning op et Kersenfestival van fruitbedrief Hoekstra an de Oosterringweg 24-1 in Luttelgeest. Meensken uut et hiele laand kommen dan op ‘e kossen van Hoekstra of. As jim die dag toch mar wat ommehangen, kun jim daor wel es kieken en mit kossen van Hoekstra en hunning van Piet Wagter op huus an gaon. An et aende van de middag he’k wat ni’je bloempies op et karkhof plaant. Tot twie keer toe hebben de slakken me daor de afrikaonties opvreten. Ik hope dat ze disse blauwe asterachtige bloempies niet lussen. Slakken bin vanzels krek meensken. Ze lussen alles niet. Ik hebbe nooit spinazie lust, ik snappe niet dat d’r meensken binnen die die vieze troep wel lussen. Awwe onder dienst een kwak van die smurrie op et bod kregen in de vreetschure (soldaotetael) van de kezerne, zeden we daor camouflagenetten tegen. Dat is ok soldaotetael.