Hunning

Ik hebbe vandemiddag nog 30 kilemeter fietst. Ik bin bi’j de Kuunder langes naor Berkoop west en daor he’k wat bosschoppies daon en argens een verjaordagskaorte in de brievebusse daon. Onderwegens kree’k een appien van aachterneve en iemker Piet. Ik kon wel langeskommen om hunning. Ik hadde gister al kommen wild, mar dat kon doe niet. Hi’j hadde zaoterdag op et Kossefestival bi’j tuunderi’je Hoekstra in Luttelgeest praktisch zien hiele veurraod verkocht. Hi’j mos eerst dus weer een flut volle potties maeken. Dat is gister gebeurd, dat zodoende kon ik weer acht potten heerlike hunning bi’j him weghaelen. Van Berkoop bin ‘k via mien huus votdaolik deur naor Wolvege fietst. We hebben tegere even genoeglik bi’jpraot en ik hebbe d’r een peer bakkies thee had mit… hunning. Over Der Izzerd bin ‘k weer naor huus gaon.

Mien drie lochtig- en donkerpaorse vlinderpollen bluuien prachtig op et ogenblik. Twie keer in de weke knip ik de uutbluuide bloemen d’r uut. Aj’ dat doen kommen d’r de hieltied weer ni’je bloemen in en bluuien de pollen dus stokken langer. A’k zo an ’t knippen bin, stao ‘k as et waore midden in een wolke van vlinders. Hiel mooi!