Hunebedbouwers

Nog veurdat Kjeld Nuis en Thomas Krol goold en zulver op ‘e 1.500 meter wunnen, bin wi’j op stap gaon. We bin vandaege naor Borger west en daor hewwe et Hunebedcentrum bekeken. Prachtig! Nao de kontrole van de QR-kodes hewwe eerst een film bekeken over hunebedden en hunebedbouwers. We gongen zoe’n zeuvenduzend jaor weeromme in de tied. Nao de film hewwe in et museumresteraant lekkere hiete poeiermelk mit slagroom en heerlik gebak had. En doe hewwe alles bekeken. We bin d’r zowat drie uren west. De tentoonstellings bin in twie grote gebouwen in een park. In dat park bin ok nog tal van naomaekhutten en -boerderi’jen uut die tied te bekieken. Hoe leefden de meensken doe? Hoe zaggen ze d’r uut? Wat atten ze? Now, ik moet d’r waorlik niet an daenken da’k zo leven mos. In zoe’n tochtig hokke. Vreselik. Die meensken wodden gemiddeld ok mar 35 jaor oold en ze weren ongeveer 1.65 meter groot. Mar et was prachtig om te zien. Een lieve poes hul oons algedurig gezelschop. We kwammen onderwegens alderhaande volk tegen: Neanderthalers, hunebedbouwers… Ik hebbe ien zoe’n kerel op petret zet. Et leek me wat een glundige kerel toe. Et zol mi’j niet verbaozen as disse man him vroeger schuldig maekt het an seksueel grensoverschrijdend gedrag. Jim kun van mi’j annemen dat zoks doe ok al een protte veurkwam. Wat dat angaot is et meensdom nooit veraanderd. Disse kerel was lichtkaans de Marc Overmars van zien tied. Ien verschil was d’r wel: hi’j verstuurde gien dickpicks. We hebben zokrek heerlik vis eten in hotel Wesseling in Dwingel. Et was een mooie dag!