Hoppe

Vandemorgen om kwat veur achte scheut ik wakker vanuut een gruwelike droom. Ik drome vaeke aekelik, mar dit was wel hiel arg. Ik mos eerst een schoffien bekommen. Ik bin vandaege weer wat dwiel, mar de geleerden zeggen dat wat fietsen goed is. Et was vandaege een lekkere temperetuur van 23 graoden. Ik bin vandemorgen naor Linda in Noordwoolde west, die het me de voeten behemmeld. Zi’j was mit man en kiender krek weeromme uut Kroatie. Et was daor zo hiete daj’ aenlik gien nocht hadden om wat uut de wege te zetten. Wie beslist nog een aende vot op vekaansie wil, kan et beste mar naor de Lofoten, de Hebriden of Shetlaand gaon. Vandemiddag he’k op ‘e fiets naor Marian in Wolvege west veur massage van zere spieren. In Hooltpae he’k onderstaonde foto maekt. Disse hoppe lust wel een lekker happien.