Hoorn

We bin vandaege naor Hoorn west om kleren te kopen bi’j Charel Men an de Kleine Noord. Dat is een mooie winkel daor we vleden jaor ok west binnen. We wollen aenlik kotte broeken veur et veurjaor en de zoemer, mar die hadden ze nog niet. Dat we gaon over een goeie maond weer naor Hoorn veur de kotte broeken. Ie moe’n as klerekoper je greenzen vanzels ok es verleggen. We kun niet almar naor Rinsma op ‘e Gediek. We hebben trouwens wel wat aanders kocht. Ik hebbe een gruun zoemerjak kocht. Neffens pattie volk was mien oolde jak mal en verscheuten. Dat ongemak is now dus oplost. Ik hebbe ok nog een prachtig shirtien kocht. We hebben daor mit kontaant geld betaeld. Ik hebbe tegen dat vrommes zegd dawwe nog een flinke flut zwat geld liggen hadden. We hebben vervolgens wat drinken mit wat lekkers d’r bi’j had in resteraant d’ Oude Waegh. Et terras in de zunne zat d’r vol. Et ligt an et plein daor et staandbeeld van Jan Pietersz. Coen staot. We hebben vroeger leerd dat dat een held was, mar ik moet now annemen dat oonze schoelemeester dat vroeger bi’j ’t verkeerde aende hadde. We hebben ok een kuier naor de haven van et prachtige Hoorn maekt. Daor veerden de Oostindiëveerders vroeger et zeegat uut. Aj’ ok mar een betien fantesie hebben ziej’ dat zo nog veur je ogen gebeuren. We hebben vanaovend waarm eten had in resteraant De zingende wielen in Den Oever. Hieronder een foto die ‘k vandemiddag maekt hebbe van de oolde Waag daor now et resteraant inzit daor we wat dronken hebben.