Hoorn

Vleden weke was et zok heerlik fietsweer, mar et was vandaege bewolkt en aorig fris. Gien fietsweer dus. We bin zodoende naor de mooie stad Hoorn west. Daor biwwe wel vaeker west, mar et is daor zo mooi. We hebben eerst in grand-kefé Winston hiete poeiermelk en gebak had. En doe biwwe naor de haven kuierd. De schipsjongen van Bontekoe hongen daor nog altied over de mure henne. Vlakbi’j de haven is et Museum van de 20^ste ieuw. Twie jaor leden hewwe dat ok al es bekeken, mar ok dat is slim de muuite weerd en bekiek et nog es. Et is vanzels een feest van herkenning. Hoe zaggen de huuskaemers d’r uut in 1920 en gao zomar deur. Ik zag alderhaande dingen die wi’j vroeger thuus ok hadden. Van pieteromstellen tot ziepekloppers, van pakken Castella tot de eerste radio’s. En zomar ziej’ Mies Bouwman, Snip en Snap, Swiebertje en Malle Pietje, The Blue Diamonds… In et museum hewwe nog wat drinken had. Vervolgens hewwe de stad nog even deurbeinseld. Ik zol een kezeschaeve kopen, mar we hebben niet zoe’n winkel zien daor ze zoks verkopen. Dat ik moet de keze, ok krek as vroeger, nog even mit een mes snieden. Op ‘e weerommereize hewwe lekker waarm eten had in resteraant de Zingende Wielen bi’j Den Oever. Zowel henne as weeromme zaggen we al prachtige bluuiende bollevelden. En doe was bi’j et begin van de Ofsluutdiek de weg richting Sneek ofsleuten. Binnendeur biwwe naor Bolsward gaon en daor konnen we weer op ‘e grote weg kommen. Et was hiel spietig dat de zunne d’r niet bi’j was. Zodoende bin de foto’s wat an de donkere kaant. Hieronder: de Heufdtoren bi’j de haven. Van daor veerden een peer honderd jaor leden de VOC-schippen naor Indië. Et riegeltien prachtige huzen staot ok vlakbi’j de haven.