Hoorn

Een weke of wat leden biwwe naor et mooie stattien Hoorn west en vandaege biwwe d’r weer henne west. Et was eerst wel mooi weer vandemorgen, mar onderwegens betrok de locht, doe begon et in Noord-Hollaand te regenen en et het de hiele dag deurregend. Et was dus parreplu-weer. We bin naor de klerewinkel Charel Men west, krek as een weke of wat leden. Doe he’k daor een zoemerjak en een shirtien kocht en vandaege twie kotte broeken, een shirtien en een vest veur op ‘e fiets en de boot. Ik batse d’r in! Op et laeste hemd zit gien buse. Naodawwe de ankopen in de auto brocht hadden, biwwe Hoorn weer ingaon en hewwe et Museum van de 20ste eeuw bekeken. Dat is vlakbi’j de haven en et staandbeeld van de jongen van Bontekoe. Wat trouwens een prachtig museum! Een anraoder! Et is een feest van herkenning! Want ja, in die ieuw bin wi’j groot wodden. In resteraant Winston an et plein daor et staandbeeld van oonze vroegere held Jan Pieterszoon Coen staot hewwe lekker waarm eten had. En doe deur de regen weer naor huus toe nao een hiele mooie dag! Hieronder een foto die ‘k maekt hebbe in et Museum van de 20ste eeuw. Dit komt jim grif allemaole nog wel hiel bekend veur!