Holtingerveld

Ik hebbe et prachtig uutvoerde boek Leestekens in het Holtingerveld van Wim van der Wijk lezen. Op zoek naar de geschiedenis in het landschap. Et boek zicht d’r prachtig uut in een had kaft en mit een protte foto’s. Et is uutgeven deur uutgeveri’je Keuninklike Van Gorcum. Et Holtingerveld is een bekend netuurgebied bi’j Haovelte. In dit boek lees ie alles over dit mooie gebied. De eerste meensken die d’r ommezwurven, rondtrekkende jaegers. Over de hunebedden, de plaanten en de dieren die d’r vroeger veurkwammen en die d’r now nog binnen. De venepoelen, de geschiedenis van et Hunehuus op ‘e Haovelterbarg, de berakkekaampen in de oorlogstied, et vliegveld dat deur de Duutsers in de oorlog anlegd wodde, de koppels schaopen die d’r weideden en de verschillende schaopshedders. En nog een hieleboel meer. Leestekens in het Holtingerveld is een riek boek!